मराठी
263 प्रभूला संतोषविणें
प्रभूला तोषविण्यास झटावें ... ध्रु
अगणित वेळा दु:ख दिलें तरी
अजुनी का उलटावें ? ... 1
पश्चातापें शरण रिघावें
हृदय तयास पटावें ... 2
त्यजुनी पापें, शुद्धमनोमय
भक्तिपटांत नटावें ... 3
प्रभूची इच्छा जाणुनि करणें
अक्षर हेंच घटावें ... 4
तारण लोकां कळवावें, कीं
आत्मिक दु:ख हटावें ... 5
अनुपम केली प्रीति जयानें
कां न तया लगटावें ! ... 6
---- कृ. र. सांगळे
_________________________________________________________________________
264 मनुष्याचें देवविषयक कर्तव्य
निर्मिले देवानें विश्व जण सारें
किती उपकारें वेष्टीले त्या ... 1
परी जण सर्व होऊनि कृतघ्न
आज्ञा केल्या भग्न ईश्वराच्या ... 2
प्रीती ना करितां दु:ख दिलें अति
प्रिय देवाप्रति मानवानीं ... 3
तर दुष्टपणा जाणूनियां आतां
पश्चातापें ताता शरण जा ... 4
संपादावी प्रीति, तया तोषबावें,
प्रेम गौरवावें, कर्तव्य हें ... 5
गौरव प्रभूचें ज्यांत होतें साचें
त्यांतच जनाचें सत्कल्याण ... 6
------- कृ. र. सांगळे
__________________________________________________________________________________________
265 ईश्वरेच्छा
तुझी इच्छा चाले जेथें
सर्व सौख्य वैभव तेथें ...1
तेथें सारेंच पवित्र
परम आनंद सर्वत्र ... 2
तुझी इच्छा स्वर्गी जैसी
प्रवर्तो ह्या जागी तैसी ...3
दास म्हणे, हि विनंती
सदा माझी, जगत्पति ...4
------ ना. वा. टिळक
__________________________________________________________________________________________
266 ईश्वरेच्छेला मान्यता
तुझी इच्छा पुढे चाले
तिच्यामागें आम्ही बाळें ...1
तुझी शक्ती करी सारें,
आम्ही निर्बुद्ध हत्यारें ... 2
तुझें राज्य येवो ऐसें
सदा आम्हां लागो पिसें ...3
हीच प्रार्थना असावी,
हीच वागणूक व्हावी ...4
तुझ्या राज्यासाठीं छळ
सोसूं आम्ही दु:ख हाल ...5
हाच आनंद आमुचा,
सत्य वदो माझी वाचा ...6
दास म्हणे, हेंच जिणें
तुझ्या राज्याला पाहणें ...7
------ ना. वा. टिळक
__________________________________________________________________________________________
267 ईश्वरेच्छा शिरसावंद्य
मिळो वा न मिळो आम्हां अन्नपाणी,
देवाच्या चिंतनी मग्न आम्ही ... 1
अंगावर चिंध्या असोत नसोत,
तसेंच जगांत राहूं आम्ही ... 2
फुलांचें शयन किंवा कंटकांचें
इच्छेनें देवाचे एक आम्हां ... 3
वधस्तंभावर आम्ही टांगलेले,
तेथेंच मिळालें सर्व आम्हां ... 4
दास म्हणे ख्रिस्ते केलें आम्हां मुक्त,
सेवनीं आसक्त झालों त्याच्या ... 5
------ ना. वा. टिळक
__________________________________________________________________________________________
268 प्रभूचें सुवंदनीय नाम
प्रभूचें सुवंदीत नाम असो ... ध्रु
मी नग्न आलो जाईन नग्न,
हा बोध मजला ठसो ... 1
प्रभूनेच दिधलें प्रभूनेच नेलें,
तरी दोष प्रभूला नसो ... 2
हरएक करणें प्रभूचें यथार्थ;
हें ज्ञान हृदयीं वसो ... 3
प्रभू हा दयाळू, प्रिय तात माझा,
दृढ भाव ऐसा वसो ... 4
------ कृ. र. सांगळे
__________________________________________________________________________________________
269 बंधूसहवास
बंधूंचें मिळणें, मधुर हें, बंधुंचें मिळणें,
जरी देव पाहिजे
इथेंच तरी तो भक्तां सापडणें ! ... ध्रु
प्रेमळ हीं वदनें मधुतर,प्रेमळ हीं वदनें
हीं प्रेमळ वचनें
सुधेचाच जणूं पाऊस कोसळणें;
हें शास्त्र सांगतें प्रेमाचं ईश्वर पहा,
हा अन्य न कोणी परी अपुला बाप हा
ह्यासन्निध रमणे हीच आपुली स्पृहा ,
काय दुजे वदणे ?आणखी काय दुजे वदणे
ह्या बंधुसंगमे केलें भूवर स्वर्गाचें येणें ! ... 1
चरितें हीं भी भिन्नने, आपुली
चरितें हीं भी भिन्नने,
परी सर्व एकतेमधें गोविलीं सुंदरशीं रत्नें,
हें केलें ज्यानें अदभूत त्याला स्तवु,
श्रीख्रिस्ता हृदयिं पूर्णपणें सांठवूं
त्या विश्वबंधूचें यश हर्षें गाजवूं !
इहलोकीं जगणें, यापुढे, इहलोकीं जगणें
हें अपुलें म्हणजे सर्व जगाचा बंधुवर्ग करणें ! ... 2
----- ना. वा. टिळक
__________________________________________________________________________________________
270 बालसदृश वृत्ती
नको नको कांही दुजें मज, देवा,
घडो ताव सेवा अहर्निश ... 1
जगाची ह्या चिंता करीं तूंच स्वामी,
आपुलीया कामीं ठेवीं मज ... 2
नको मज वित्त, नको मज नावं
तुझ्यासाठीं धाव पडो माथां ... 3
चाकर मोलाचा नको मज करूं,
तुझें मी लेकरूं ख्रिस्तद्वारां ... 4
लेकुरपणा हा वाढताच राहो,
सदा पुअर वाहो आनंदाचा ... 5
तुझ्या काजीं माझें जिणें हे सरावें
हेंच मज द्यावें कृपादान ... 6
दास म्हणे, बापा, आतां हीच आशा,
इतर विनाशा हेतू जावो ... 7
--- ना. वा. टिळक
__________________________________________________________________________________________
271 देवाच्या पायी चित्त ठेवणें
कोणी वांदा, कोणी निंदा,
आहे आम्हां अमुचा धंदा ... 1
नाहीं कर्तव्य कोणाशीं,
मागूं आम्ही ख्रिस्तापाशीं ... 2
नाहीं जगाचें ऐकत,
असे ख्रिस्ताला ऐपत ... 3
दास म्हणे होवो काहीं
माझे चित्त त्याच्या पायी ... 4
---- मा. कृ. उजगरे