मराठी
६१८. नव्या वर्षाची प्रार्थना
आधी आम्हाला वांकीव,
पुढें व्हावें तें शिकिव ... १
कसें आयुष्य मोजावें
तुझ्या आत्म्याला हें ठावें ... २
तोच, बापा, आम्हां व्यापो
जिणे आमुचें हें मापो ... ३
माप रात्रंदिवसाचें
किंवा केलेल्या कर्माचें ... ४
सांग कोणते उचलावें
जिणे तूतें मापून द्यावें ... ५
दिधल्याचें काय झालें
तुवां पाहिजे पाहिलें ... ६
तेव्हां देशील पुढचें
दान, देवा अक्षयतेचें ... ७
दास म्हणे, जिणे माझें
तुझ्या आत्म्याविण ओझें ... ८
---- ना. वा. टिळक