७५६. यात्रिकांस आमंत्रण या चला चला, चला काल्वरी जाऊं प्रेम खिळलेलें पाहुं ... ध्रु गिरि मधुमंगल हा भारी चढला प्रभू जनकैवारी सकलांना तो पाचारी निज सुमनां तत्पदी वाहूं ... १ मोदें हे जीवन नाचें घ्या दर्शन घ्या तीर्थाचें शांतीचें, सतसौख्याचें प्रेमभरे अमृत सेवूं ... २ रुधिराची गंगाजमुना हि वाहे झुळू झुळू भुवना पतितांनां दे संजीवना या चला तिजमध्यें न्हाऊ ... ३ पापाचें ओझें अपुलें प्रभू खांबी घेऊन गेले नेलें हो वाहूं नेलें उद्धरिलें अपणा, गाऊं ... ४ घ्या वधस्तंभ निजस्कंधीं गा जय जय ख्रिस्तानंदीं वाजवा टाळ मृदुछंदी हि दिंडीं प्रभुपदीं नेऊं ... ५ ----- वा. स. निर्मळकर